Pagpangilkil sa taga HPG-7 maoy motibo?

Dunay rason nga maglagot gyud ang mga opisyales   sa  Highway Patrol Group (HPG-7)  kang late Atty.  Noel Archival gumikan kay namasangil  ang abogado kaniadtu nga grabe  gyud  ka kurakot   ang  mga  operatiba sa  HPG-7.

Gani  akong  nahibaw-an  nga  mikiha si  Atty.  Archival ug  17 counts  nga extortion batok  sa  mga  kadagkuan ug mga  operatiba sa HPG-7 didto sa  Military  and Other  Law Enforcement Offices (MOLEO)  Ombudsman Manila.

Gawas  niini  akong  nahibaw-an nga  midangop pa  si  Atty.  Archival  sa  national media  ug  gipa-publikar  ang  giingong  pangwarta  sa mga opisyales.

Usa  sa  mga kliyente ni Atty. Archival nga si  Jane Catherine Go O mipasangil kaniadtu  kang SPO1 Aldrin Gulingan nga  mi-demanda matud pa ug 200 mil  pesos  bugti  sa pag-release  sa  iyang  sakyanan  nga  Nissan Xtrail Wagon  nga  gi-impound.

Tampered matud pa ang chassis ug engine number ubos  sa ngan ni  Chris Reinz nga maoy bag-ong registered owner. Dugang pa sa taga HPG-7 sa  ilang  kiha  ni Go O nga  carnap ang  sakyanan  kay matud  pa ang  tinuud  nga tag-iya  mao si  Frederick Pepito Matta  nga taga 2224 M. Roxas St. Sta Ana Manila.

Sa column ni Ramon Tulfo  sa Philippine  Daily Inquirer niadtong October 17, 2013 nagbutyag  nga  dunay  mga Sugbuanong negosyante nga  midangop  kaniya didto  sa Manila  ug gireklamo  ang mga opisyales  sa HPG-7 nga susama  ug  modus  operandi  kang  SPO1 Gulingan.

Nanganlan  sa maong  lindog  sila si S/Inspector Joselito Lerion, PO2 Romeo Guirigay, PO1  Alex Bacani, PO1 Jonard Dagangan, PO1 Edwardson Masangue ug  PO1 Erlando Metante  Jr.
Sa  samang  lindog  ni Tulfo,  giingong mireklamo  ang mga  negosyante  batok kang HPG-7 Chief  nga si Supt. Romualdo  Iglesia  kay  way  aksiyon   sa  ilang  reklamo  batok  sa  iyang  mga sakop  nga nangwarta.

Kining  mga  isyuha  gigamit   kining  depensa  ni  Atty.  Archival  sa  mga  kasong  anti- carnapping, anti-fencing ug uban  pang  kaso  nga   gipasaka  sa  taga  HPG-7  batok sa  iyang kliyente  nga si Go O.

Si Cebu  Assistant  City Prosecutor  Ramon Carisma  nga maoy  nag-conduct sa preliminary  investigation sa kaso ni Go O mikompirmar  nga  gi-manifest  ni  Atty. Archival  ang publication ni Tulfo.

Balik  ta  sa  kasong  pag-ambush- patay  nilang  Atty. Archival,  ang   kasaligang  tinubdan  nga sakop sa  Task  Group Archival  mibutyag  nga  duna  gyud  silay  lig-ong  ebedensiya batok sa taga  HPG-7.

Kay gawas  nga  gitumbok  sa  lone  survivor  ang  duha  ka mga   impounded vehicle  sa  HPG-7  nga Toyota  Coralla  Vios kolor  pula ug kolor  gray  nga Mitsubishi Strada nga maoy gisakyan,  nakuha  pa  gyud  nila ang  logbook sa guwardiya nga gipagawas  kining  duha  ka mga sakyanan  sa adlaw sa wa  pa  gibanhigan  sila si Archival ug  nakasud pagbalik ang mga  sakyanan  sa compound mga  upat  ka oras  human  gi-ambush  ang  abogado ug mga kauban  didto  sa  Barangay Coro Dalaguete.

Unya  nakabutang  usab sa  logbook  ang mga sakay. Kung  kinsay mga  sakay matubag  kana  sa taga NBI  nga  maoy  nag-andam sa  kasong  multiple  murder  nga  posibleng  ipasaka  dili  madugay.

Unya  gawas  niini,  dunay  andam  mo state witness  sa  maong  kaso.

Pero in fairness sa taga HPG-7, ilang gihimakak  ug  andam  silang  magpa lie detector  test.

* * *

Dili sa  ingon nga  milaban  ko sa  habig  ni Richel  Bacaltos apan  bisan  unsaon nako  pag-analisar  kinahanglang  motuman  nalang  sila  si Talisay  City Mayor  Johny  Delos Reyes ug

Dr.  Paulus Mariae Cañete nga  karong  Miyerkules (March 26, 2014)   ang graduation sa  mga tinun-an  sa  Talisay  City  College.

Usapon ug  tunlon  nalang  ang  garbo Mr. Mayor ug  Dr. Cañete  aron  dunay   kalinaw  ang mga   tinun-an ilabina  nga  mi-back-up na ang taga Commission on Higher Education (CHED-7) sa schedule sa graduation rites.

Dili ko motoo  nga  ang  mga respetado nga  mga  educator  mopataas  pa sa  garbo  nga di maghatag  ug  kaayuhan.

Kung  di  kaya  ni  Dr.  Cañete ug Mayor JVR  nga  motambong sa  graduation ceremony,  adto  sila  sa Talisay  City Landing celebration ug  ubang kalihukan.

Ayaw  na  intawon ninyo  bulabuga  ang mga estudyante,  kana  kung  mga  tarong  mo! Hinaut   nga way  laing graduation ceremony sa Talisay  City College.

* * *
Misamot   ka  risgo  karon  ang mga  motorista   dinhi sa  dakbayan  sa  Sugbo  ilabina  sa  mga  mag-motor ug mag-bisikleta kay  sa  akong  paglibot-libot  medyo  daghan  karon  sa mga  kalsada  ang  gipangguba aron  ilisan  ug  aspalto.

Gawas sa   “uneven surface” sa  kadalanan nga  maglisod na pag-  control  sa  manobela  ang  mga  motorista, napun-an   kini  sa  laing  problema nga  mao  ang  pagdaghan  karon sa  mga  iro  nga  anaa  naglatagaw sa  kadalanan nga usahay  mokalit  lang  paglabang.

Niadtong  Sabado  atul  sa  among  programang  “Dialogue On The  Air” sa  DYSS  Super  Radyo  giklaro  ni  Dra.  Pilar  Romero, OIC  Cebu  City  Veterinarian  nga  nagpadayon  ang  ilang  pagpangdakop  sa  mga  iro  nga  pinasagdan  sa  mga  tag-iya.

Problema  lang kay  wa  pa silay bag-ong  sakyanan nga  gi-design sa paghipos  sa  mga iro.

Apan akong  nasabtan nga  medyo maglisud sila pag-ila sa  mga tag-iya  nga  maoy  pangkasohan  kay dili na  mangangkon  panahon  sa  dinakpanay.

Sa  lalawigan sa Sugbo,  akong  nasabtan nga way  dinakpanay sa  mga  iro  nga wa  hikti ilabina sa  mga  lungsod nga way  facility  nga maoy temporaryong  kabutangan.

Suma pa  ni  Dra. Mary An Gabona sa Cebu Provincial  Veterinary Office  nga 50 porsiento  pa  sa  mga  local  government  units  ang  dunay  kabutangan  sa  mga  ma-impound  nga  mga  iro.

Kung  mao  ning  kalakiha nag-ayo lang  kita  paghimo ug  balaud  apan  wa gyuy  klarong implementasyon.

* * *

Nahuman na kagahapon ang elimination round sa Newsmen Basketball Association (NBAC) diha sa  Cebu Eastern  College ug  ang makasulod  sa top  four  alang  sa semi  finals nga sugdan  karong  Domingo  mao  ang  among  team  sa GMA-7/DYSS,  TV-5,  Sunstar-Bombo Radyo-Brigada  News  ug  ang CCTN-47.

Karong  Domingo Marso  30,  makigharong  kami  sa CCTN 47 alang sa 1st game  unya  sa 2nd game magbangga  sab  ang  TV-5  ug  ang combined team  sa Sunstar-Bombo Radyo-Brigada News.