Way eye-witness ang NBI-7

Circumstantial evidence versus denial and alibi ang bugno sa asunto ug sa pagpangayo og hustisya  sa mga  kabanay  ni manlalaban Noel Archival ug sa ubang mga biktima sa pagpang-ambush  niadtong Feb. 18 sa  Coro, Dalaguete.

Sa gi-file  kagahapong adlawa sa taga-National Bureau of Investigation kon NBI nga kasong multiple murder ug  kasong frustrated  murder  sa Cebu Provincial Prosecutor’s Office batok  sa mga opisyales  sa Highway Patrol Group in Central Visayas (HPG-7), way testigo nga nagbutyag  nga sila nakakita  sa actual  nga panghitabo.

Kadtong  unang gipagawas  nga dunay mo-state witness  medyo  hanap pa sa  diyes panas. Pero  maglaum ko nga mahitabo  gyud  nga modayon pag-testigo ang usa sa mga apil sa  kaso.

Ang  hingpit  nang  gipangkasohan  kagahapon mao sila si HPG-7 director, Senior Supt. Romualdo Iglesia nga  taga-Luzon,  HPG-7 Cebu  provincial director, Senior Supt. Joselito  Lerion nga  taga-Bohol,  Chief Insp.  Eduardo  Mara,  head  sa  impounding  area ug  taga-Argao, Cebu,  SPO4 Edwin Galan taga dinhi sa Cebu City ug  PO1 Alex Bacani nga  taga-Luzon ug  several John Does.

Unsa  katinuod  nga si  PO1 Bacani nga gikan sa  Manila HP maoy gi-hire  nilang Iglesia  pagtira nilang Archival  uban sa  mga back-up?

Unsa  sab katinuod nga  si PO1  Bacani  nakigkita  pa kang  Dumanjug  Mayor  Nelson Garcia  sa  mga  alas-3 sa hapon human sa ambush  ug  nagpaka-aron ingnon nga  mihimo  sila og surveillance sa mga hot cars  didto sa Dumanjug?

Nag-surveillance kaha to sila si PO1 Bacani sa Dumanjug?  Or  didto  sila  ni-exit  gikan sa Dalaguete  human sa  execution?

* * *

Pwera  gaba gyud  intawn ning  agi karon sa WT Construction  sa pag-ilis og  aspalto  sa  atong  mga kadalanan  ilabina  ang  habig sa University of the Philippines-Cebu sa Gorordo Avenue, sa Camputhaw,  Lahug   ug paingon sa Marco Polo Hotel.

Inay   malipay  ug matagbaw kitang mga  taxpayers sa  ilang agi apan  makapungot man  kaayo.

Maglibog gyud  ko kun gi-unsa  nila  pag-trabaho kay wa man matarong pagpatag ang  mga dalan. Dunay  parte  nga  lubong kaayo ug dunay  parte   nga taas.

Gani dunay ubang parte nga nangalungag na ilabina  ang  habig  sa  may Marco  Polo Hotel duol  sa panimay ni anhing Chief Justice Marcelo Fernan.

Gawas niini, dugay kaayo  silang makahuman sa pag-trabaho ilabina diha  sa  UP Lahug. Kanang dapita  medyo  taud-taud na gyud  na nilang gi-guba ang aspalto  pero  hangtud  karon  wa pa gyud baliki og trabaho.

Delikado  intaw-on  kaayo sa disgrasya sa mga  mag-motor  ug  mag-bisikleta.

Dili  na makabadlong  ang mga  kadagkoan sa  Department  of Public Works and Highways sa performance  kay gi-una  pag-kobra  ang kickback?

Dili  sa  ingon nga misupak  ko  niining  maong  proyekto kay  makahatag man  kini og  kaayuhan sa tanan pero  unta  tarungon og  trabaho  ug  dili kanang sinurambaw  ug   limitahan nila  ang  pagguba sa  mga daan  kung wa pay  ikatapak.

Maglaum ko  nga bisan  kinsang contractor mosimpatiya   sa kaayuhan  sa  tanan.

Nagkita mi niadtong  Lunes sa  hapon  ni Engr. Adolfo  Quiroga nga consultant sa  WT construction ug mipasabot nga  ang  usa  sa  mga  hinungdan  nga  malangay  tungod  kay matag  gabii  ra gyud  silang  makatrabaho.

Iyang  gisuportahan  ang akong sugyot  nga limitahan lang ang  pagguba  sa  mga  kalsada  unya  sundon og  tapak  sa  aspalto.
Hinaut nga matuman ang akong gamay nga tampo kay haskang hasola gyud sa ilang paagi.

* * *
Ang  sikat  nga  Sugbuanon nga  kanunayng  magpalansang  matag Biyernes  Santo nga  si  Gilbert  Bargayo  adto  gihapon  sa Tuburan  Plaza magpalansang  karong Biyernes.

Kini  maoy   ika-20 niyang  pagpalansang  sa  edad  nga  51  ug  ikaduhang  higayon diha sa lungsod  sa  Tuburan.

Iyang  gibutyag  nga dunay daghang tanyag kaniya sa  diin-diin  nga lugar nga  adto  magpalansang  apan  mas gipili niya  ang  Tuburan  tungod kay si Mayor Aljun  Diamante  maoy  nakapatukod sa iyang  kapilya didto sa  Sitio  Mabugnaw Guadalupe Carcar. Kini  maoy  gi-isip niya nga pina-kadakong gasa sa iyang  mga pagpalansang.

Sa  akong  interview niadtong Sabado  atol sa  among  programang “Dialogue On The Air” sa dySS Super Radyo wa  makalikay   pagpadayag si Bargayo sa  iyang kahiubos sa  ubang  mga  politiko  kay  matud pa  nag-ayo lang sa saad pero  inig  kahuman sa pagpalansang  talikdan  na siya sa pagpatukod  og kapilya.

Gawas niini,  gibutyag  sab  ni Bargayo ang pait niyang kasinatian didto sa Tacloban  niadtong pagkahuman sa  bagyong  “Yolanda”. Miadto siya sa Tacloban  aron  paghatag og desenteng  lubong  sa  iyang  igsoon nga  usa  sa  mga  biktima.

Matud  pa  niya nga  wa  gyud  sila  makatilaw  og  imported nga  pagkaon didto  taliwa nga dunay  daghang  nangabot  nga  gikan sa  lain-laing kanasuran. Pait!

* * *

Lahi  na gyud ang dagan  sa  panahon karon. Niadtong gamay  pa  ko,  hangtud  nga  nagdako, init gyud kaayo ang adlaw ug mabatyagan gyud ang  Kuwaresma.

Kaniadto, dili na gyud ta  makasinati og pag-uwan  ug  pagdag-um basta  mosulod na ang Semana Santa.

Pero karon  nausab  na gyud ang dagan  sa  panahon. Sukad   niadtong Sabado hangtud kagahapon sa pagsuwat  ning maong lindog, kisdom  ang kalangitan  unya  uwan  kaayo.

Ang  taga-Philippine Atmospheric, Geophysical, Astronomical Services Administration miingon nga posible  man gani  nga molungtad  kini sa   Easter Sunday.

Basig  gituyo kini sa Ginoo aron pahinumdoman kita  nga dili  nato  i-convert  ang Semana  Santa ngadto  sa  bakasyon  ug  lipay-lipay.
Panahon intawn karon sa pamalandong ug kinahanglan atong  batonan!