Jobert Flores | CDND PHOTO / Gerard Francisco
“Lima na ko katuig nga nag-gwardiya. Pila pa lang ko ka bulan dinhi na-assign sa Daanbatayan. First time nako ron nga wala ko kauli sa akong asawa ug anak atol sa Pasko.
Taga Bacolod ko pero tua sa Escalante, Negros Occidental nagpuyo akong asawa nga si Analyn Parlocha ug among anak nga si Jillian Kate kay taga didto man siya.
Pagsugat sa Pasko, nagsige lang mi og tawag sa akong asawa ug sa akong anak. Naguol gyud ko nga wala ko makauban nila sa Pasko pero unsaon ta man nga mao man ni akong trabaho. Pagsugod na og kusog sa uwan dala sa bagyong Ursula, nawad-an na og kuryente. Wala na ko ka-charge sa akong cellphone mao nga wa na koy contact nila. Pagkusog sa hangin, hapit pa gyud ko naigo sa guard house nga nilupad.
Adlaw sa Pasko, wala gani mi mapalitan og pagkaon nganhi sa terminal kay sirado man ang mga karinderya. Nagpalit na lang kog bugas ug de lata unya mangita lang kog kahoy diha sa unahan aron makalung-ag kay di man makagamit sa rice cooker kay wala may kuryente.
Manawagan lang ko sa akong asawa ug sa akong anak nga ayaw lang mo og kabalaka. Okay ra ko dinhi pero wala pay kuryente maong lowbat akong cellphone ug di ko ka-contact ninyo.”
/ celr
