outbrain

Nagpakaulaw sa SAP ang social worker sa Lapu-Lapu

By: Lloyd Suarez - Columnist/CDN Digital | May 09,2020 - 08:30 AM

 

Mas maayo’ng moresign, kung may delicadeza pa si Lapu-Lapu City Social Worker Officer I, Ma. Eleonor Feliciano, tungod sa  pag-apil  sa  iyang lima ka mga miyembro sa pamilya nga sagad kanila dili kuwalipikado sa  Social Amelioration Program (SAP) nga tabang  sa  national government ngadto unta sa mga labing pobre nga pamilya  nga apektado sa coronavirus disease 2019 o  COVID 19.

Wa untay isyu kung pobre gyud ug kuwalipikado nga modawat ang iyang mga sakop sa pamilya.

Ang nakaporke kay ang uyab sa iyang anak nga may trabaho diha sa airport apil nga SAP beneficiaries.

Ang iyang igsoon nga nagpuyo og subdivision apil sab unta nga padawaton ug ang iyang bayaw nga ang bana may trabaho sa abroad.  Wa manawat kay gibaharan na diay ni Mayor Junard  Ahong Chan dihang nakadawat ang mayor og letter complaint gikan sa usa ka residente sa  Barangay Basak.

Kagahapon, nakatilaw gyud siya’g insulto ug kasaba harap harapan ni Mayor Chan nga daan na’ng nag-alintabo sa kalagot kay nanabi kini nga fake news ang alegasyon batok kaniya.

Nanghulga pa si Feliciano nga mokiha’g libel ni Lou Anne Mae Rondina  among  kauban sa GMA-7 Balitang  Bisdak/Regional TV nga  maoy unang nakapabuto sa isyu. Unya  mibahad pa nga  duna siya’y daghang kaliwat sa Lapu-Lapu.

Nasuko siya ni Lou Anne  kay  nadaut  kuno iyang reputation ug nanghambog pa nga suportado kuno siya sa iyang department head og hepe sa DSWS Lapu-Lapu ug andam kuno nga mohatag niya’g abogado.

Kagahapon nga na-interview siya ni Sir Bobby Nalzaro sa among sibyaan sa DYSS Super Radyo, iyang gi-angkon ang lima ka mga personalidad nga apil sa listahan sa SAP beneficiaries nga iyang mga sakop sa pamilya ug  ang uyab  sa iyang anak.

Gani nanghambog pa siya nga di lang lima kay daghan siya’g mga  kadugo diha sa Barangay Basak.

Apan iyang gipasabot nga dili siya maoy nanghatag  sa  mga SAP  forms ug wa  siya’y kalibutan nga mi-apply sa SAP iyang  mga sakop sa banay. Iyang gibasol  ang ilang  mga volunteers nga maoy nang distribute sa mga forms nga nagpasagad lang.

Wa sab kuno siya’y oras pag-verify sa tagsa-tagsa ka mga pangan  tungod sa kadaghan ug wa siya kahigayon pag-double check kay  gi-apil siya pag-quarantine dihang nag-positibo sa COVID 19  ang hepe sa ilang department head sa Social Welfare and Services. Ultimo si Mayor Chan dili gyud motoo ni Feliciano nga way nahibaw-an nga naapil iyang mga sakop sa banay.

Gawas  pa sab, dili  katoho-an si  Feliciano nga moingon nga wa siya’y  oras pag-double check kay mas daku sila’g oras pag-verify sa ngan  nga  gipa-ubos siya sa quarantine ug sama sa hepe sa DSWS miklaro  sa mga  interview nga padayon ilang trabaho sa opisina bisag nagCOVID positive.

Mao ni ang klarong ebidensiya nga dunay mga opisyales sa  gobyerno nga nagpahimolos niining mga ayuda sa gobyerno.

Bisan ako nakadawat og daghang reklamo pinaagi sa text ug tawag sa lain-laing lugar nga gipa-mulitika ug dunay mga pinalabi niining programa sa gobyerno.

Maglaum ko nga ipublikar sa taga DSWD ang tanang mga nakadawat sa SAP per barangay aron masubay sa tanang agrabiyado kung wa bay tinunto ang mga  social workers, mga opisyales sa barangay, sa lungsod ug sa ubang mga local government units.

Akong  paabuton ang resulta  sa  imbistigasyon sa City Legal  Office sa dakbayan  sa Lapu-Lapu  nga  gitahasan pag-imbistigar ning maong social worker.

***

Positibo ko nga makabangon ra gihapon ta sa atong  ekonomiya  ug  sa  atong  mga  negosyo taliwa nga apektado kita karon sa COVID 19.

Ang atong mga negosyante sama nila’ng Philip Tan ug Steven Yu sa  Mandaue Chamber of  Commerce and  Industry  (MCCI) nga akong  na-interview, mi-estimate nga molanat pag duha ka tuig una mauli-an  ang ekonomiya sa nasud.

Pero sa  akong kabahin, makabangon ra ta  in  less than a year.

Matud nila nga tungod unya sa ipatuman nga new normal mo-abot og sobra 50 porsiyento sa  mga  kompaniya ang  manirado dinhi sa Sugbo kay  dili gyud makaya tungod niining social distancing ug ubang mga preventive  measures nga ipatuman.

Nakasabot ko sa atong mga negosyante nga mao ni ilang forecast kay  puwerte gyuy’ng pagtidlom sa atong ekonomiya ilabina nga apektado  ang tibuuk kalibutan sa COVID 19.

Ang mga negosyante miingon nga inig balik sa negosyo gamay ra  gyud ang makalahutay. Ang apektado kaayo  mao kadtong micro and small enterprises ilabina nga ang produkto mga  non essentials.

Sumaa pa lagi nila nga inig balik sa negosyo, susama ang sitwasyon  sa gripo sa tubig nga nag-ayo lang sa pagdayong abli nga mo agas pa apan pagkataud-taud  hangin na lang ang mogawas sa gripo.

Mihatag sila’g tambag sa tanang trabahante nga di gyud mag-usik-usik sa kuwarta. Gikan sa trabaho mouli dayon ug di na maghapit-hapit  sa mga bay kahilayan unya  mananom gyud  aron mabuhi ang pamilya.

Sa laktod, kasamtangang mag-antos ug magsakripisyo ta human sa enhanced o  general  community quarantine. Apan makabalik  ra ta  apil ang Super Hirit inig ka normal sa sitwasyon. Laban lang! /dbs

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.