Tungod tingali kay mas grabe man ang uwan kay sa gikahadlukang hangin, tungod tingali kay ang unang nataho nga gikusgon niani dinha ra man sa 45 kph, kumpyansa ra kaayo ang mga molupyo sa mga lungsud ug dakbayan nga nahimutang sa agianan sa bagyo nga Seniang.
Nangandam ang tanan sa pag-abot sa bagyo nga Ruby nga giingong manghud lang og gamay ang kabangis kon itandi kini sa mangtas nga Yolanda. Mga 200 kph ang gikusgon ni Ruby mao tingali nga way nalisang sa kusog ni Seniang nga unang gitaho nga may 45 kph lang nga gikusgon. Misaka ang kusog ni Seniang ngadto sa 65 to 80 kph nga hinay lang gihapon kon itandi sa kusog nila ni Ruby ug Yolanda.
Hinay ang kamang ni Seniang, langan siyang mo-uswag mao nga taas-taas ang iyang panahon nga manghasi sa matag lungsod nga iyang maagian. Ug kay di man kusog kayo ang iyang hangin, tibuok ang binusdakan sa iyang uwan nga maoy hinungdan sa pag dahili sa mga yuta sa bukid nga mitabon og pipila ka panimalay ug maoy hinungdan sa kamatayon sa mga 53 ka binuhat. Kinig maong tinibuok nga uwan mao usay hinungdan sa pagbaha nga mi gun-ob og mga kalsada ug taytayan ug ingon man sa pag-anud sa mga tanom, hayop, tao ug kabtangan.
Gikataho nga duol sa usa ka bilyon ang danyos sa habagatang bahin sa atong lalawigan. Pero wa man kitay mga lakang nga mosanta sa pagdagsa ning maong katalagman. Apan ang pagkawala sa kinabuhi nalikayan unta kon dihay saktong kahibawo ug pagsabot sa sitwasyon. Ang maong kakuwang maoy niresulta ngadto sa kompyansa nga midala og kamatayon.
Ang leksyon nga gibilin ni Seniang mao kini: wala nay bagyo nga ka-kompyansahan.
Usa ka masulob-ong tuig ang 2014. Daghang abyon ang nahagsa karong tuiga. Kasagaran kanila Malaysia-based.
Ngapdayon pag pamatay ang sakop sa ISIS sa mga tao nga mosupak kanila sa mga parte sa Syria ug Iraq. Samtang sa Africa mikatap ang sakit nga ebola nga gamay ras mataptan ang maka lingkawas.
Sa Shanghai, China ang usa unta ka mabulokong pagsaulog sa pag-abot sa bag-ong tuig nga 2015 nahimong maduguon. Tungod kini kay duna may ni-itsa gikan sa bintana sa hotel nga gitapukan sa mga tao og mga kupon nga daw dolyares tan-awon sa layo. Nanag-ilog ang mga tao og kuha ning maong papel hinungdan nga dihay nangatumba ug nangatumban nga resulta sa kamatayon sa 36 ka binuhat ug sa pagka angol sa 45 ka tao.
Sa akong bahin usa ka uyuan ug iyaan ang mipanaw tungod sa sakit ug tingali usab tungod sa katiguwangon kay puros naman sila kapin sa 80 ang panuigon. Wala kanato’y gusto mamatay og sayo. Apan ang malampuson sa paglikay niani igo na lang pud nga maghandum sa mga sayo nibiya.
Apan bag-o pang nisulod ang 2015, maayo tingali mo smile tag gamay.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
