Ronaldo Valdez dunay samad pinusilan; mga kauban sa balay nag-paraffin test
Ronaldo Valdez
Nagpaabot karon ang pamilya sa beteranong aktor nga si Ronaldo Valdez sa resulta sa gipalapdan nga imbestigasyon sa kapulisan sa iyang kamatayon.
Basi sa inisyal nga imbestigasyon sa Quezon City Police District (QCPD), nakita nga dunay samad pinusilan sa iyang ulo si Ronaldo.
Nakit-an ang lawas ni Ronaldo sa sulod sa iyang lawak sa iyang panimalay sa Manga St., Barangay Mariana, New Manila, Quezon City niadtong Domingo sa hapon.
Sa report sa QCPD-Criminal Investigation and Detection Unit (QCPD-CIDU), nakit-an si Ronaldo sa iyang drayber nga si Angelito Oclarit sa 3:20 sa hapon.
Matud sa kapulisan nga naglingkod si Ronaldo samtang naggunit og caliber .45 nga pusil.
Patay na sa dihang gidala si Ronaldo o si Ronald James Dulaca Gibbs sa St. Luke’s Hospital. Siya 76 anyos na.
Sa balita sa “24 Oras,” gikumpirma ni Police Major DonDon Llapitan, ang hepe sa CIDU-QCPD, nga wala nay kinabuhi ug dunay samad pinusilan si Ronaldo sa dihang nakit-an sa iyang drayber.
Mibuhat dayon ang QCPD og lapad nga imbestigasyon aron mahibaw-an kun unsa gyud ang nahitabo kang Ronaldo ug kun duna bay foul play ang kamatayon niini.
Ug tungod sa nakita nga armas sa iyang kwarto, gipaubos usab sa paraffin test ang tanan nga kauban niya sa balay isip kabahin sa standard operating procedure sa maong imbestigasyon.
Apan gi klaro sa QCPD nga wala magpasabot nga may kalambigitan sa kaso ni Ronaldo ang tanan nga gipaubos sa paraffin test.
Sa pagsuwat niining maong balita, gipaabot pa ang resulta sa gibuhat nga paraffin ug ballistics test sa kapulisan. Mipasalig ang kapulisan nga magpagawas unya sila sa ilang official statement kun mahuman na ang ilang gibuhat nga imbestigasyon.
Uban niini, mihangyo ang QCPD sa publiko nga dili magpost og sayop nga impormasyon kabahin sa kamatayon ni Ronaldo ug unta i-respeto pud ang privacy sa iyang pamilya.
Nangayo usab og privacy ang anak ni Ronaldo nga si Janno Gibs samtang nagbangutan ang ilang pamilya.
“It is with great sorrow that I confirm my father’s passing. Your prayers and condolences are much appreciated,” matud pa ni Janno.
* * *
Kung kailangan o may kakilala na nangangailangan ng kausap, maaaring tumawag sa Hopeline, ang 24/7 suicide prevention hotline, sa telepono bilang (02) 804-4673; 0917-5584673.
RELATED STORIES
Police conducting ‘thorough investigation’ on Ronaldo Valdez’s cause of death
Kathryn sa iyang tribute kang Ronaldo Valdez: ‘You are the lolo I never had’
Ronaldo Valdez, bantogan nga aktor, nitaliwan na sa edad nga 76 anyos
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
