Mag-presidente gyud si Duterte?

Hugot  ang akong  pagtuo  nga  padayon  pa’ng naniid ug  nagpadugang sa  pusta   si Davao  City Mayor Rodrigo Duterte sa iyang paglansar  pagka-presidente bisan  wa siya  moduso sa iyang certificate  of candidacy niadtong Biyernes.

Unya  nako  motuo nga seryuso  siya  nga di  molansar  hangtod mapupos ang office  hours sa  December 10 nga maoy  deadline  sa  substitution and  withdrawal nga puwede siya’ng  ihulip kang  Martin Dino nga iyang kapartido  sa PDP-Laban  nga naka-file og COC sa labing taas  nga  puwesto sa nasod .

Sa lagda,  giklaro  nila  ni Atty.  Marchel  Sarno  ug Atty. Enerio  Ocariza Jr. sa  COMELEC  nga bisan  kadtong wa makaduso  og COC puwede’ng  ipuli  sa kandidato  nga  nakaduso  na bisan  unsang  position iyang  gilansaran  basta  parehas  silag partido nga  accredited ug  rehistrado  sa COMELEC.

Nag-obserbar  lang  ni  si Mayor Duterte kung  daghan  ba  ang magpa-upaw. Wa pay  nanawagan nga “pakalbo  pa  more?”

Kadtong  pag-file  niya  sa  certificate  of  candidacy isip  mayor gihapon  sa Davao nga gitohoang  invalid kay  expired na ang  notarial commission sa abogado,  dili kaha  kadto  maoy clue ni  Duterte ngadto  sa  iyang  mga  dumadapig nga  modayon siya pagka-presidente?

Kining  gipakatap nga  mga tarpaulin sa  kadalanan nga “Duterte –Cayetano,  Laban Na!”  dili  kaha  kini  tipik ug  kabahin sa ilang strategy?

Kung  number  1  pa seguro  sa mga survey  si  Duterte,  wa nay daghang  estorya ug wa nay daghang pakulo. Posible  pa nga siya maoy nag-una sa COMELEC      pag-file sa  iyang certificate  of candidacy.

Akong  subli-on  nga  kung  mograbe  gyud ang suporta sa  katawhan sa iyang kandidatura,  segurado  ko nga modayon siya.

Nagpanukos-nukos  pa ni  siya ron. Iyang  gisukod ang reaction sa  kadaghanan sa  iyang  wa  pagduso og COC pagka-presidente.

* * *
Bisan  dinhi sa  ato  sa  Sugbo,  posibleng  maingon  ani  ang  sitwasyon nga  dunay  mga  dagkong  kausaban  sa  line-up  karong  Disyembre 10.

Final na  ba gyud  si  Atty.  Winston Garcia  maoy  pambato  sa One  Cebu party  pagka-gobernador? Dili  kaha  mobalik si  kanhi Governor  Gwendolyn Garcia human  nga  mas  kusog  si  Gwen?

Sa Liberal  Party, segurado  na  ba  gyud  nga si  incumbent  governor  Junjun  Davide  gihapon?  Dili  kaha  ipasa  ngadto  kang  Vice Governor  Agnes Magpale kay  si  Gov. Junjun  magpa-appoint   na pagka associate  justice?

Sa records sa  Provincial COMELEC,  unom ang  mi-file  pagka-gobernador.  Gawas  nilang  Gov. Junjun  ug  Atty. Winston,  magpapili gihapon si Roliveth Cortes

“Klasmit  Boyet”,  Nonito  Magnanao, Leandro Patalinghug  ug Desiderio Estinozo.

Samtang tulo  ang magtigi pagka bise-gobernador  nga sila si Magpale  ingon man  silang Juanito  Montenegro ug kanhi kongresista Nerissa Soon -Ruiz.

Samtang sa  Cebu City COMELEC, one-on-one silang  Tomas Osmeña ug Mayor Rama pagka mayor ug  one-on-one  usab silang  Vice Mayor  Edgardo Labella  ug City Councilor Nestor  Archival.

Manghinaot  ko  nga  consistent ang  kabuotan  sa atong  mga  politiko gikan  niadtong ilang  pagtambong sa santos  nga  Misa sa wa  pa sila  mo-file  hangtod sa katapusang adlaw sa  pangampanya.

* * *

Kompirmado  na  nga  kadtong  kalabera  nga  nakit-an  sa pag-utlan  sa Badian  ug  Dalaguete, iya gyud   kang PO1 Jimmy Jorge nga taga  Manlapay Dalaguete.

Sa autopsy,  may samad  pinusilan  ang  iyang bagol-bagul  ug buot  ipasabot  duna  gyu’y  foul play  ang  iyang kamatayon ug  kinahanglang dunay manubag.

Ang  pangutana:  kinsa  may  utok  sa  pagpatay  ning  maong  pulis? Kinsa  may  naglagot  kaniya?  Ug  unsa  may  motibo sa pagpatay?

Practically  sa  police investigation,  tanan  suspect gyud    apil  na  ang  kabanay  sa  pulis ug  bisan  iyang  mga  kauban sa  serbisyo ug  pundok sa  mga  sindikato.

Si  PO1  Jorge escort   kaniadto  kang  Cebu City  Mayor  Michael  Rama sa  wa  pa ma-missing.  Nganong  tak-om  man  tuod  si  Mayor Rama  sa  iyang  kamatayon?

Unsa   ka  tinuod nga  dili  maayo’g  relasyon  si PO1 Jorge  ngadto  sa  iyang  asawa  sa  wa pa  kadto  mawala? Pero  in fairness sa  asawa, natural  man  gyud  ning  away  sa  magtiayon.  Gawas  pa sab,  di sab seguro  maka-ako ngan  nga duna silay tulo ka  mga  anak.

Dili  kaha  kauban  ra’ng  pulis  ni PO1  Jorge ang  responsable  nga  gisugo   sa sindikato?

Kinsa  man  ang mga  kaubang  pulis  ni Jorge  nga  mi-escort  ni Mayor  Rama  kaniadto sa  wa  pa  siya  ma-missing niadtong  December 2013?

Maglaom  ko  nga  dili  ma-inutil  ang   task group  nga gitahasan  sa  pag-imbistigar  kay mitiyabaw  intawon  ang  kabanay  karon  nga  kahatagan   og  hustisya  ang  iyang  kamatayon.