Kada buntag, daghang bayabas ang magkatag sa among tugkaran. Gipangtagak kini sa mga kwaknit. Kining klaseha sa kwaknit gitawag og “fruit bat.” Ang laing klase sa kwaknit mao ang vampire bat nga mamaak. Kining maong kwaknit maoy manggawas sa sine nga Dracula. Tingali belated Halloween story kining maong atong pagtuki kabahin sa mga bampira. Apan sa lain, murag mas maayo nga karon ta kini hisgotan kay aduna man diay daghang vampires karon sa America nga ganahan moinom og dugo sa tawo. Apan dili susama sa mga vampires sa pelikula, wala silay gahom o supernatural powers.
Dili susama sa atong nakita sa mga sine nga Twilight o di ba kaha hinuon sa TV series nga “True Blood,” kining maong mga binuhat dili makalupad, dili extra kusgan, dili immortal ug dagko kini silang buhi. Gani nahinam sila sa dugo sa tawo kay nagtuo sila nga makabaskog kini kanila. Morason sila nga for health reasons ang ilang pagka bloodsuckers.
Matod pa sa sinulat ni David Robson nga migawas sa website sa BBC, daghan kanila ang naa sa New Orleans apan hapit tanang mga dagkong dakbayan sa tibuok kalibutan dunay sama kanila. Matod pa ni Robson, dili sila mga buang ug dili usab sila motuo sa paranormal. Dunay mga nurse, mga secretary ug mga bartender kanila nga gatuo nga ang dugo sa tawo makapawala sa ilang labad sa ulo, sakit sa tiyan ug sa pagkaluya. Sa unang mga panahon, ang dugo sa tawo gihimong tambal sa patol ug ingon man sa pagtabang sa mga himatyon sama sa ilang gipahimo sa usa ka Santo Papa niadtong 15th century.
Kasagaran sa ilang kuhaag dugo ang ilang mga kapuyo ug mga higala. Ug kon may makita silang bag-ong donor, ila usa kining ipa blood test kon dili ba kini masakiton. Mahimong kuhaan nilag dugo ang donor pinaagi sa syringe (suyop sa injection) o mahimo sang samaran nila kinig gamay dayon suyopan nila ang samad. Ug kon mao kini ilang himuon, kinahanglan nga mag mouthwash una ang vampire.
Ug tungod kay wa pa man madawat sa dagkong katilingban ang pag-inom sa dugo sa tawo, gatago-tago kining mga modern vampires. Duna silay mga ginagmay nga pundok diin silang tanan puros kaila. Gitugotan nilang mosuwat si Robson kabahin nila basta di lang ibutyag ang ilang mga tinuoray nga mga pangalan.
Sa ato pa, mas kahadlokan pa diay ang metaphorical (pasumbingay) vampire kay sa literal. Kay kini gong mga symbolic vampires sa mga corrupt public officials, mga negosyante nga mo-over price ug mga police nga mangayog tong, mas makapatay man sa kadasig sa nasod ug makadugang sa kalisod.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
