Wa pa gani mag 40 days ang among pinanggang inahan sukad gikuha sa Labaw’ng Makagagahom, nag-atubang na sab intawn ug laing problema ang among pamilya karon kay gi-atake sa high blood ang among igsoon nga si Tete Yurie ika-unom namong 13 ka magsoon.
Nag-usa na siya ka semana kagahapon sa Vicente Sotto Memorial Medical Center (VSMMC) ug talandugon gyud ang sitwasyon kay may blood clot ang iyang tu-o nga utok. Susama sa sitwasyon sa among pinanggang inahan.
Sa sinugdanan, mo-respond pa ang among igsoon panahon nga among istoryahan apan kagahapon di na makabuka ang mga mata.
Si Dr. RJ Aguanta, neuro- surgeon sa (VSMMC) mi-desider nga operahan gyud sa ulo ang among igsoon aron makuha ang dugo nga maoy naka-ingon sa paghubag sa iyang utok ug maoy hinungdan nga mopa-ingon na nga mag-comatose.
Sama sa gipasabot kaniadto ni Dr. Wyben Briones nga dili gihapon garantiya ang surgical operation nga makaayo sa among igsoon.
Sa pagsuwat ning maong lindog, gisulod na siya sa operating room ug among gitugyan ang tanan sa mga kamot nila ni Dr. Aguanta ug mga kaubanan sa (VSMMC) ilabina sa atong Langitnong Amahan alang sa malampusong operasyon.
Sa tinuod lang, kaliwat gyud sa among pamilya kining sakita nga hilabihan ka traydor.
* * *
Makapahi-ubos gyud ang sitwasyon karon sa Vicente Sotto Memorial Medical Center (VSMMC) kay akong nahibaw-an nga mag-tulo (3) na diay ka semana naguba ang CT-Scan.
Paeta gyud sa mga pasyente nga pobre nga critical kaayo kay i-adto pa sa Cebu Doctor’s Hospital ipa CT-Scan.
Maayo ra ba unta kung dunay available dayon nga ambulance ug mga personnel nga maka-transport paingon sa Cebu Doc ug pabalik sa VSMMC.
Crucial gyud baya kaayo ang pag-balhin-balhin sa pasyente.
Nganong na-ingon ani man ang kahimtang? Tungod ba kay grabe ang bureaucratic red tape sa gobyerno sa pagpa-ayo sa machine? Nganong usa ra man ka CT-Scan machine diha sa VSMMC nga pwerteng daghana sa mga pasyente?
Maayo unta nga matagad kining maong problema sa labing sayo nga panahon.
In fairness hinuon, nakadayg ko sa ka limpiyo na sa VSMMC ug sa mga personnel apil na ang mga intern nga andam gihapon nga mo-serbisyo taliwa nga dunay mga pasyente ug mga kabanay nga mopakitag batasan nga dili na masabtan.
Wa na koy kuwestiyon sa pagka-eksperto sa mga doctor diha kay ang mga ngilngig nga mga doctor sa Sugbo nangalagad man sab diha sama nilang Dr. Wyben Briones, Dr. Ramon Najarro ug uban pa.
* * *
Dili gyud makabasol si presidente Noynoy Aquino nga dunay manaway sa iyang ika-5th SONA kon State of the Nation Address niadtong Lunes sa hapon.
Kay dili ikalimod nga duna gyu’y mga pagkuwang sa iyang pagpangalagad.
Apan kinahanglang sabton sab gyud nato kay tawo ra si P-Noy. Dili intawn siya Ginoo ug dili siya Superman.
Ang dakung butang nganong mi-minus ang iyang popularity rating kini tungod kay wa gyud niya lutosa ang iyang mga kaalyadong opisyales sa gobyerno nga nalambigit sa pagkawat sa PDAF kon Priority Development Assistance Fund.
Unsa may gihimo niyang Budget Secretary Butch Abad? Mao nga di gyud siya makabasol sa katawhan nga mamasangil nga dili siya seryoso sa iyang anti-corruption campaign.
Sa kadaghang mga pangan nga ka partido sa LP sa presidente nga apil sa PDAF scam apan wa niya pa-imbistigahi. Tinarong pa ni?
Mao ni ang “Tuwid Na Daan”? Mao nga maka-ingon ko nga yaga-yaga ra gyud to iyang giingon nga “The Filipino is worth dying for, The Filipino is worth living for, The Filipino is worth fighting for.” kay wa siya sa buhat.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
