Alang nako mas maayong mohangyo sa Korte Suprema ang pamilya ni anhing Bien Unido Bohol Mayor Gisela Boniel nga anhi sa Sugbo ang venue sa court trial ug ipa-consolidate ang tanang mga kaso batok sa bana nga si Board Member Niño Rey Boniel ug sa mga kaubanan.
Unang rason kay nakita na nga may inhustisya ngadto sa pamilya sa mayor human pabuhi-an unta ang mga suspetsado kay kuno illegal ang pagka-dakop.
Ikaduhang rason nako mao nga risgo kaayo sa mga testigo ang pagbiyahe ngadto sa Bohol ug dinhi sa Sugbo nga magbalhin-balhin. Impluwensiyado ug kuwartahan baya ang mga Boniel.
Ikatulong rason mao nga aron makadaginot ang gobyerno sa gasto ngan nga sumpay ra ang mga kaso ug mao ra sab ang mga akusado ug mga testigo.
Unsa man sab ning gipasi-atab karon nga atua sa Dubai si Mayor Gisela?
Kung segurado nga atua sa Dubai maayong kuyogan si bokal Boniel aron iyang kuhaon ug ipresentar sa publiko.
Akong tan-aw wa may kalainan ang ilang depensa niadtong kontrobersiyal nga parricide case batok kang PBMA supreme master Ruben Ecleo Jr. nga daku kunong buhi si Alona. Himan-himan hangtud karon way Alona nga nabanhaw!
* * *
Maayo kay naminaw sa akong radio program sa DYSS Super Radyo ang operator niadtong unom ka mga dagkung sakyanang depasaheruan nga nakadisturbo pag-ayo sa mga manimbahay ug nagpuyo kay diha gi-parking duol ra ug atbang sa Saint Therese Parish Church sa Barangay Lahug.
Nakahasol g’yud kaayo kadto kay mapugwat intawon ang katulog sa mga silingan kay usahay mag-sunod-sunod pag-abot sa ilang parking area nga tungang gabii na.
Pun-an pa nga apiki kaayo ang lugar nga maoy hinungdan nga ang helper sa mga buses puwerteng dagku-a sa tingog nga mo-abag pag-parking sa driver.
Sa panahon nga manggawas, laing disturbo sa katulog kay usahay dunay biyahe sa alas 4:00 sa kadlawon.
Usahay sab grabe ang traffic diha sa Saint Therese kay tayming nga inig gawas sa mga buses mao say tinggawas sa mga parokyano gikan nga nanimba.
Salamat intawon kay karong bag-o ug pipila na ka adlaw ang milabay wa nako maka-kita sa mga dagkung sakyanan. Nagsugod sila pag-parking niadtong buwan sa Mayo.
Akong nahibaw-an nga ang operator mibalhin og laing lugar kay matud pa giradyo sila.
Ambot kung giimbistigahan ba kadto sa taga Land Transportation Franchising and Regulatory Board (LTFRB) kung legal ba ang ilang operation kay nasayran nga mga tourist bus kadto unya maoy gamiton sa taga L.E. Tours panahon nga mahutdan sila’g mga buses pag-cater sa ilang mga customers.
* * *
May rason si Presidente Duterte nga magpabilin ang martial law sa Mindanao ug sa posibleng pagdeklarar og martial law dinhi sa Visayas kay gisakyan karon sa mga traydor sa gobyerno ang pakiggubat sa mga klarong terorista didto sa Marawi.
Akong subli-on bisan pa lagi ipatuman ang martial law nationwide, wa koy pagsupak kay ang atong kaayohan maoy gitan-aw sa Presidente.
Sumaa unsay gihimo sa mga rebelde, gisung ang usa sa mga police station didto sa Iloilo. Otro sab ning taga Bangsamoro Islamic Freedom Fighters (BIFF) nga mitisok sab og kagubot didto sa North Cotabato.
Mao ning klaseha sa mga tawo nga makig-sabot alang sa kalinaw?
Mao na ni ang epekto sa mga nangaging administrasyon nga gipadaku ang ulo sa mga rebelde ug ang mga progresibong pundok sa Mindanao.
Gipakaon na sa gobyerno ang mga kanahan ug wa pa makontento kay hasta ang tudlo sa nagpakaon apilon pa’g lamoy.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
