Kinsa man gyud ang real target sa patay niadtong Biyernes sa gabii diha sa Infinity KTV and Music Bar sa Archbishop Reyes Avenue duol sa Cebu Business Park?
Dili kaha si Peter Lim nga maoy tag-iya o ba kaha ang iyang manghod nga si Wellington Lim?
Kung si Peter Lim ang target, nganong anginon pa man si Wellington nga wa may labot sa listahan sa Presidente?
Gipakete nalang si Wellington ngan nga naapil kini kaniadtu sa expose ni kanhi kongresista Antonio Cuenco?
Mao na ba kini ang resulta sa gipamulong ni Presidente Duterte nga iya gyu’ng patyon si Peter Lim tungod sa giigong pag supply og shabu dinhi sa Kabisay-an?
In fairness ni Peter Lim, makadaghan na niyang gihimakak ang mga pasangil kay inosente gyud siya unya daghan kaayo ang kaparehas niya og pangalan.
Pastilan kung inosente gyud si Peter Lim. Wa kaha mataghapi ni Mr Lim nga mga pulis ray responsable sa pagrakrak sa iyang manghod?
Sa pikas bahin, ang pagpusil-patay kang former Talisay City Councilor Emil Go ug sa pagsuway og kutlo sa kinabuhi sa kanhi Talisay City Deputy Jail Warden dili kaha sumpay sa operation ni Steve Go sa illegal drugs?
* * *
Mga sugarol sa manok ug sa ubang klase’ng sugal kinahanglang panaminan ang nahitabo sa miaging tuig nga Biyernes Santo nga dihay sugarol nga gi-atake sa kasing-kasing patay kay wa kaginhawa sa prisohan diha sa Carbon Police Station kay puwerteng daghana nilang nadakpan sa tigbakay sa Pahina Central.
Unsaon man nga bisag Biyernes Santong daku gi-una man ang sugal.
Pagmatngon intawon kamo ug ayaw padakop kay tingali sa prisohan mamalandong kay taas kaayo ang way trabaho unya sirado ang piskaliya ug korte.
Sa laktod dili ka piyansa ug dili ka molta. So tanggong gyud.
Kining Simana Santa dili intawon bakasyon ug dili intawon kita magyampungad sa sugalan kung dili mangadto kita sa mga simbahan.
* * *
Lunes Santo karon. Kini maoy ikaduha nga balaang adlaw sulod ning atong pag-obserbar sa Simana Santa o Pamalandong 2018.
Kagahapon gisugdan pinaagi sa “Palm Sunday” o “Pagbendeta sa atong mga lukay“.
Sa kinaraan laksot na gyud i-trabaho sugod karong adlawa kay panahon na sa pamalandong.
Ilabina sa mga tawo nga dunay mga kinaadman ug gibinlan niini, dili na magpakita sa ilang tagsa-tagsa ka kaugalingong panimay kay mituman sa
mga sugo sama sa pag-adto sa taas nga bukid, pagsulod sa mga langub ug uban pa’ng mga awa-o nga lugar nga atua nila makaplagan ang ilang mga tuyo ug tahas.
* * *
Hapit gyud ko makaligis sa mga batan-ong lalaki nga nagdulag basketball kilid sa kalsada diha sa Maracas Lahug niadtong Biyernes sa dayong kilom kilom samtang nagpadulhog ko paingon sa JY Square.
Suwerte lang nga nikupot pa akong brake kay kung wa disgrasya gyud.
Paeta gyud bitaw niining ubang mga batan-on nga gamitong playground ang atong mga kalsada. Bawal intawon na oy.
Asa man tawon ang mga ginikanan ug mga opisyal sa gobyerno? Wa gyu’y nakabadlong ug way nakatangtang sa ilang basketball ring nga gipatapot lang sa haligi sa VECO nga nagbarug sa kalsada?
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
