outbrain

‘Wa na sa ponto si Presidente Digong!’

By: Lloyd Suarez February 09,2020 - 09:00 AM

 

Wa ko kakita sa logic ni Presidente Duterte nga iyang  gihagit ang mga opisyal sa gobyerno nga pabisitahon sa mga pasyente nga nagpositibo sa 2019 novel coronavirus.

Unsay gamit nila didto? Unsay himoon nila sa ospital?

Aron lang gyud ingnon nga dili kahadlokan ning maong balati-an nga sa tinuud, gikabalak-an gyud?

Patay man gani kadtong Doktor sa China nga maoy whistleblower ning maong sakit?

Nganong atong ibutang sa alanganin ang mga opisyal nga way hanaw?

Dili pa gyud paigo ang atong mga opisyales sa Department of Health nga maoy gitahasan pag-atiman ug kinsa may igong katakus pagdepensa sa ilang  kaugalingon?

Gani sa tinuud lang, mismo atong mga pulis nga gipabantay niadtong mga tawo nga gipa-ubos sa 14-day quarantine period, nabalaka  man gani sa ilang sitwasyon.

Gusto sa presidente nga ipakalat pag-ayo ning maong sakit sa tibuuk nasud? Porbida!

*****

Makapa-isa gyud sa kilay nganong  gipulihan  dayon si Police Brigadier General Valeriano De Leon nga bag-o  pa gani’ng milingkod isip Director sa Police Regional Office (PRO-7) dinhi sa Central Visayas.

Wa matagbaw si PNP Director General Archie Gamboa sa iyang performance kay sukad sa iyang paglingkod  minus na ang patay sa mga nalambigit sa illegal nga drugas?

O ba  kaha kadto ning isyu nga nasakpan nga nagduwa’g golf ang tulo ka mga dagku’ng opisyal sa tiempong tingtrabaho nga medyo gi-tolerate lang ni De Leon?

Apan unsa ka tinuud nga dunay dakung papel ang usa ka kanhi opisyal sa kapulisan na nakaserbisyo sa siyudad sa Sugbu niining pagparelibo kang De Leon kay dili ni sila maayo’g relasyon?

Atong hatagan og benefit of the doubt ang bag-ong  hepe sa kapolisan dinhi sa Central Visayas nga si Police Brigadier General Albert Ignatius Ferro.

Way kalainan ang mission ni Ferro sa mga nangagi nga mao ang seryoso’ng pakig gubat sa illegal nga drugas  ug paglimpiyo sa ilang hanay sa kapolisan.

Usa sa iyang hulga ngadto sa mga City ug Provincial PNP Director mao ang three-strike policy nga nagpasabot nga kung dunay tulo ka mga PNP station chiefs nga pang-relibohan, ilisan sab ang naglingkod  nga director.

Ambot unsaon pagsulbad ni Ferro kining problema sa  illegal nga drugas kay inay mogamay na ang supply,  misamot naman hinoon kadaghan.

Pila ka mga “ninja cops” ug drug protector ang nagpabilin sa PNP? Nganong dili man kini nila unahon paggukod?

*****

Usa ko sa gihugawan diha sa sikat nga Larsian Barbecuehan nga anaa duol sa Fuente Osmeña kay gawas niining reklamo sa mga netizens nga dunay daghang mga ok-ok ug ilaga, nakatayming sab ko’g kaon diha sa usa sa mga stalls nga dunay iro nga gipahimutang duol sa gi-display nga luto-onon.

Sa sinugdanan wa ko makakita sa iro, apan dihang  naluto na among mga order mao pay pagkakita nako sa iro nga giduwaan sa iyang amo sa sulod sa stall.

Kay nasayod pa ko nga diha’y iro mobalhin na lang unta ko’g laing kan-anan nga way iro.

Nagpakita lang gyud ni kung unsa kahugawan ang mga  nag-abang diha. Ug nagpakita lang gyud ni kung unsa  ka tanga ni’ng taga Cebu City Health.

Diha’y higayon nga nakatiming sab ko nga nagla-undok ang basura diha sa Larsian sa may parking area kay wa kuhaa ang mga basura sa Department of Public Services.

Ngan nga kan-anan ni, ila unta na’ng estriktohon taman sa ginhawa.

Unsa man sab ang gihimo sa taga Kapitolyo nga maoy tag-iya sa lote ug maoy nagpa-abang? Way plano si Governor Gwen nga ipahunong ang operation sa  Larsian?

Diha pa’y higayon nga akoy nagpalong sa tubig kay ang tigpa-agas sa tubig nga nagpundo sa barel nakatulog. Way ayo!

 *****

Duna pa gyu’y mga huwes nga di makamao’ng molikay  sa mga isyu sama sa pagpangutang og kuwarta sa ilang mga litigante.

Kaniadto dinhi sa dakbayan sa Sugbo dihay huwes nga mipa-priso mismo sa iyang staff kay nanabi nga nangutang ang huwes og kuwarta sa usa ka lending company nga may kaso sa ilang sala.

Way kalainan] kadto sa nahitabo karon kang Cagayan  De Oro City RTC Branch 20 Judge  Bonifacio Macabaya nga gitangtang sa Korte Suprema tungod sa maong kaso.

Wa hatagi og bili ang iyang pagpanghimakak ug depensa nga giinitan siya sa iyang mga labaw kay mi-execute og sworn statements ang iyang gipang-utangan.

Maglaum ko nga wa nay huwes dinhi sa ato nga magpabadlong! Paglikay tawon mo uy for delicadeza./dbs

Read Next

Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.

We use cookies to ensure you get the best experience on our website. By continuing, you are agreeing to our use of cookies. To find out more, please click this link.