O Rolex, O Relihion: Tambal sa kaguol; Tinubdan sa kasakit.
Kalit nga may kisaw sa social media dihang nakita ang relo nga gituohang Rolex sa tuong pulso sa mitawag sa iyang kaugalingon og Caliph Ibrahim nga way lain kon di si Abu Bakr al-Baghdadi nga maoy pangulo sa ISIS o Islamic State of Iraq and Syria.
Ang ISIS usa ka pundok sa mga jihadist nga bisan ang Al-Qaeda dili moangkon tungod sa ilang kabangis. Kusog kayo kini manghambug sa ilang gipamatay nga kontra ug sa mga building nga ilang gipabuthan og bomba nga ila dayong ipasikat sa ilang mga maayong pagkahimo nga mga video sa YouTube. Mga video nga matud pa sa usa ka CNN anchor murag Hollywood apan tinuod lang.
Gasugod ang ISIS nga kadaghanan sakop sa tribo nga Sunni sa civil war karon sa Syria, diin ginamit ang extortion ug ang ilang kahanas sa pag pangayog amot ug recruits sa social media, midaku ug milig-on sila hangtud nga misugod silag branch out sa Iraq diin walay round nila ang mga sundao sa mga lungsod ning maong nasud. Dinhi karon gatukod silag caliphate.
Ang caliphate usa ka estado diin ang relihiyon ug gobyerno gipadagan ubos sa balaud sa Islam ug gipangulohan kinig usa ka khalifah (caliph) o successor ni Mohammed. Maurag usa ka militante nga Santo Papa kon sa Katoliko pa. Ang damgo nga magkahiusa ang tanang muslim sa kalibutan ubos sa usa ka caliphate maoy gibaligya sa ISIS sa mga batan-ong gusto mag jihadist ug sa mga may kayugotgut sa western powers nga maoy nag buot-buot sa pagpadagan sa middle east.
Ug dihang mibutho ang daw mahalong relo sa mitawag sa iyang kaugalingon og caliph nakadawat dayon kini og mga saway sa social media nga dili kini tinuod nga spiritual leader kay kalibutanon ra kaayo kini og pamatasan.
Ug gitubag dayon kini sa mga media spinner sa ISIS nga dili Omega o Rolex ang relo sa caliph kon dili ang Islamic watch nga Al-Fajr WA-10S Deluxe. Nagbalor kinig US$560. Ang Rolex ug Omega may balor nga mga US$5000. Ubos ra ang kantidad ning Islamic watch kon itandi mo sa mga luxury item sa western nga nasud.
Swiss-made kining maong relo ug dunay prayer alarm. Nagkanayon ang tighimo niani nga –“In addition to the prayer alarms, the Swiss-made watch has a built-in compass to indicate the direction of Mecca, Islam’s holiest site, so believers will know what direction to pray. The bilingual watch displays in English and Arabic and allows you to choose either the Gregorian or Hijra calendar, which is based on the astronomical moon sighting at Mecca.”
Maayo tingali nga mag-market na ang cherry mobile og Islamic phone mintras wala pa kini masudli sa Apple ug Samsung.
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
