‘Sakrispisyo ug motuman lang ta nga magpuyo sa bay’

Wa mapan-os ug wa gyud ko masipyat sa akong  baruganan  nga kinahanglang maglockdown na ta dinhi sa tibuuk Sugbo batok sa coronavirus disease 2019 o COVID-19.

Bisan nalangay ang deklarasyon nila ni Governor Gwen Garcia, Cebu City Mayor Edgardo Labella, Lapu-Lapu City Mayor Junard “Ahong” Chan ug Mandaue City Mayor Jonas Cortes apan nakasabot  ko tungod kay wa pa ka andam ang tanan niadtong mga sayo’ng bahin ning buwana ug labaw na’ng nagkagidlay silang taga gobyerno.

Gawas niini, niadtong higayona dili  pa  alarming  ang  gidaghanon sa na- infected sa maong sakit dinhi sa ato.

Apan karong  panahona  maoy insakto ug tukma  na  gyud  nga maglockdown  na ta ug wa nay kompiyansa kay sa ihap kagahapon sa nationwide nga data miabot na og 54 ang namatay samtang misaka  na ngadto sa 803 ka mga kompirmadong mga  kaso.

Maglaum ko nga mo-cooperate kita’ng mga Sugbuanon  sa ipatuman karong udto’ng tutok nga Enhanced Community Quarantine (ECQ) dinhi sa dakbayan sa  Sugbo,  unya  ugma  (Sunday)  sa  alas 12:01 sa sayo’ng kadlawon diha sa Siyudad sa Lapu-Lapu ug inig alas 12:01 sa sayong buntag sa Lunes (Monday),  ipatuman sa Mandaue ug sa tibuuk na gyud Sugbo.

Magpalahi  kita’ng  mga  Sugbuanon  sa  Davao, India  ug China. Didto  sa Davao laparo ug sagpa maoy  silot sa  mo-violate.  Sa  India, takal gyud o  bunalan  ang sampot  sa  binugha. Kuyaw sa China kay  komunistang nasod, dili  magpanuko ilang mga  militar pagpahamtang og silot sa mga badlungon.

Ngan  unta  ba  nga  kita’ng  mga  Sugbuanon  sagad  mga  edukado,  dili tawon ta  pasaway ug  magpabadlong  sa mga tinugyanan.

Ang  tuyo niini’ng  ECQ o lockdown  mao  nga  magpuyo  kita sa atong tagsa-tagsa  ka  panimay aron  dili  na  mokatap  ang virus.

Mogawas  lang  ang usa ka  miembro  sa  pamilya  nga  otorisado  nga  may quarantine pass pagpalit sa mga gikinahanglan kaayo ug sa  ubang importante’ng transaksiyon.

Likayan lang gyud nato ang pagpanic. Kalma lang ug atimanon ang  kahimsug sa atong  panglawas ug labaw  na’ng mangaliya  kita  sa  Kahitas-an nga mapasaylo kita sa atong mga nahimo’ng sala ug  atong  pangayoon Kaniya nga hilison na niya ang COVID-19 sa tibuuk kalibutan.

Mohangyo lang sab ko sa atong mga militar, kapolisan ug sa  ubang tinugyanan nga sa higayon nga duna gyu’y mogawas sa ilang  panimay nga way quarantine  pass, tarungon  lang gyud pag-estorya  ug  pasabton.

Apan  kung  balido  gyud ang paglakaw tugtan lang sab seguro  nila. Dili sagpa-on, dili takalon  ug  pusilon kay tingali’g silay mangapriso human sa  usa  ka buwan nga lockdown.

Panahon sab ni sa taga Commission on Human Rights (CHR-7) nga magmonitor sa dagan sa implementasyon.

Mohangyo lang sab ko sa dili otorisado nga  mogawas, kinahanglang di  mang-insulto  sa  mga otoridad bisag barangay tanod pa na o mga civilian volunteers. Respeto lang gyud ta kay di sab tawon tiaw ang ilang kahago ug sakripisyo alang kanato.

Ari ko sa  pagpang-apod-apod  unya sa quarantine pass ug mga  pagkaon, dili  kaha  ni ipa-mulitika sa mga  iresponsableng opisyal  sa gobyerno? 

Mowarning  lang  ko sa  mga  mamulitika  rong  panahuna  nga likayan  gyud kay  tingalig  kamo  maoy mamomo. Dili ron panahon  sa pamulitika. Kini  maoy tiempo sa  pagtinabangay.

Sa  atong  mga sundawo,  kapolisan ug ubang  mga tinugyanan,  may insakto kaha sila sa gidaghanon lukop Sugbo aron maoy mopatuman sa  lockdown? Makaya  kaha  nila ang  pagbantay  nga  way mogawas  sa  mga  panimay?

***

Di sa ingon nga milaban ko ni Cebu City Councilor Prisca Niña Mabatid, pero akong tan-aw medyo tagilid ang gi-andam nga kiha sa atong kapolisan batok kaniya nga kalapasan sa Cybercrime  Law subay niadtong iyang gibutyag sa iyang FB post nga nag-kompirmar nga dunay tulo ka mga kaso sa COVID-19 dinhi sa dakbayan sa Sugbo.

Kremin na ba kung magtug-an sa tinuud ang tawo? Ang impormasyon ni Mabatid nga nakuha way kalainan sa among nadawat.

Bisan  ako nakadawat og A1 information nga dunay nagpositibo sa COVID-19 sa  usa  ka pribadong ospital  niadtong Sabado  sumad  karon.

In fairness ni Mabatid validated  man  ang  iyang  information dihang  miklaro  ang taga Department  of  Health 7  nga duna  nay mga “presumptive positive” sa COVID-19.

Mao  ni  ang nakadaut  sa taga  DOH-7 nga dili transparent pagtug-an sa tinuud./dbs