‘Martial law ta versus COVID-19!’
Kung seryoso gyud ang gobyerno batok niining Coronavirus Disease 2019 o COVID-19, nganong di naman lang modeklarar og martial law si Presidente Rodrigo Roa Duterte suud sa pipila ka simana o mga buwan aron mapadali ang pagsulbad ning maong krisis?
Kinahanglang mosakripisyo kita niining panahuna aron dili mosamot ang sitwasyon.
Ipatuman ang total lockdown sa tibuuk nasud unya kadtong mga gahi’g ulo ipa-priso aron motagam.
Unya samtang ubos kita sa martial law ug total lockdown kinahanglang hatagan og pagkaon sa gobyerno kadtong mga pobre gyud kaayo nga maoy apektado.
Martial law declaration akong nahuna-hunaan nga maoy pinaka-epektibo tungod kay segurado nga makalikay kita sa COVID-19.
Maka-ayo kini sa ekonomiya sa nasud kung madali ang pag-sulbad kay sa magsige kita’g atras-abante sa mga lakang nga makapa-apiki na hinoon kay naulahi nata paghimo’g mga prevention.
Gawas pa sab mga gahi na kaayo’g ulo ang mga estudyante. Giingnan nga magpondo sa panimay, nanglaag hinoon human gipangsuspenso ilang mga klase sugod niadtong Martes.
Nanghambog ang gobyerno nga duna tay insaktong kuwarta nga binilyon pag-combat sa COVID-19 pero unsa may kapuslanan ni-anang binilyong salapi kung dili na gamiton pagpalit og mga kagamitan, pagkaon ug mga bitamina batok sa COVID-19?
***
Lahi na gyud ron ang atong sitwasyon tungod niining grabeng pagsaka sa nainfected aning COVID-19 kay nakapa-alarma ug nakamugna’g panic kanato ug sa tibuuk kalibutan.
Dili na gyud ni ka komedyahan. Sa amo-a lang opisina sa GMA-7 Complex bawal na gyud nga makasulod ang dili trabahante.
Kami nga mga kawani, ipa-ubos sa thermal scanner ug mandatory gyud ang pagbubu og sanitizer o alcohol sa among mga kamot aron pagsiguro.
***
Samtang sa mga korte sa Qimonda IT Center, sugod niadtong Biyernes nga misuspenso sa mga hearings, gisugdan sab dayon ang pagdisinfect sa mga court premises.
Sa emergency meeting nila ni Executive Judge Macaundas Hadjirasul nasabutan nga ipatuman gyud ang social distancing.
Dili na kinahanglan nga paadtoon sa bista ang mga dinakpan unya papirmahon og waiver for non-appearance.
Kadtong mga bag-o pa nga dinakpan nga dalhon sa Qimonda adto ra sa gawas sa building papaabuton samtang magpaabot sa iyang commitment order sa huwes.
Samtang kadtong magpakasal, pakuyugan lang sila og unom ka tawo sa ilang isig ka pamilya.
Unya ang mga abogado gitambagan nga di na lang magdala og mga tawo gawas niadtong motestigo sa mga kaso.
***
Mas daghan ang pangutana kay sa tubag sa pagpusil-patay niadtong Miyerkules sa hapon kang Municipal Councilor Maria Liza Toledo didto sa munisipyo sa Ginatilan.
Kinsa man gyud ang responsable nga migamit og sniper rifle?
Dili kaha tagagobyerno ra ang mi-unay?
Unsa may background sa biktima? Negosyante? Narco politician?
Unsa may motibo sa krimen?
Segun sa hepe nga atua kini sa Manila nagpuyo unya mouli lang sa Ginatilan panahon nga sila magsession.
Unsa ka tinuud nga apil kunohay ni siya sa drugs watchlist ni Presidente Duterte? Unsa ka tinuud nga kunohay ang hinigugma niini atua napriso sa New Bilibid Prison nga kunohay padayong nakatransact sa iyang negosyo sa illegal drugs?
In fairness ni Konsehal Toledo nga kinsa kunohay nangangkon nga paryente ni Presidente Duterte, dili na siya katubag sa mga isyu batok kaniya.
Way kalambigitan ang pulitika sa iyang kamatayon? How about sa iyang negosyo ug ubang personal nga butang? Maayo tingali nga subayon ang tanang anggulo.
Makapang-lingo-lingo lang ko kay babaye’ng daku unya elected public official pa gyud ang biktima.
Maglaum ko nga matubag kining tanan sa gi-umol nga SITG o Special Investigation Task Group./dbs
Disclaimer: The comments uploaded on this site do not necessarily represent or reflect the views of management and owner of Cebudailynews. We reserve the right to exclude comments that we deem to be inconsistent with our editorial standards.
