‘Credible ba gyud atong mga testing kits sa COVID-19?’

Makapaduda sa accuracy ang atong mga testing kits dihang nag-negatibo dayon sa COVID-19 (coronavirus disease 2019) ang batang lalaki nga bag-ong gi-anak nga unang nag-positibo. Laing makapalibog kay ang inahan nag-negatibo man.

Gi-angkon ni Dr. Jaime Bernadas nga director sa Department of Health in Central Visayas (DOH-7) nga “false positive” ang nahitabo sa newlyborn baby kay posibleng sayop ang unang reading. Apan iyang gipasalig nga tagsa ra kini mahitabo o isolated na kaso lang.

Sa nahitabo kaha sa mga piniriso sa Cebu City Jail ug sa mga residente sa Sitio Zapatera, Barrio Luz,  dili kaha to mga “false positive”?

Way plano ang siyudad nga subli-on sila pag COVID test for second and third opinion?

Di ba sab maayo nga prior ipagya sa publiko sa taga Department of Health ang mga resulta ma-double check nila og tarong ma negative man o ma positive?

Mas makapa-alarma baya ni sa publiko ug mismo sa nahingtungdan? Di  lalim ang traumatic experience nga maangkon mismo sa tawo nga gitoho-an nga gi-COVID 19.

Unsa kahay maayo nga undangon na lang ning mga massive ug rapid testing?

Ang pangtestingan  kadto na lang mga pasyente nga dunay symptoms sa COVID-19 nga gidala sa mga tambalanan.

Nabalaka sab ko nga sa tantong sige’g massive testing nato mas daghan pa ang positibo unya kini maoy basihanan nga langay-langayon ang paglibkas sa ECQ nga maoy makapahurot sa atong panudlanan ug makapalukapa og samot sa atong ekonomiya.

Unsa may gamit pananglitan kung daghan pa ang mag-positibo unya dili gihapon madala sa hospital kay  asymptomatic?

Kung ang tuyo mao lang ang pag- quarantine, dili  ba epektibo  ang home/self quarantine apil ang tibuok pamilya?

***

Duna ba kahay kamatuoran ang alegasyon ni kanhi Cebu City Mayor Tomas Osmeña nga dunay corruption/overpricing sa gipamalit nga mga bugas sa siyudad sa Sugbu nga gipanghatag sa mga residente nga apektado sa lockdown karon tungod sa coronavirus disease 2019 o COVID-19?

Wa ba kaha tontoha si Mayor Edgardo Labella sa iyang mga alipores?

Nangutana lang ko kay ako mismo nakapalit ko’g maayong klase nga bugas humay nga “Doña Conchita,” color orange  half-sack o 25 kilos nga nibalor lang og P1,150.00. Didto ni nako napalit  sa usa ka tindahan sa Gorordo Avenue, Barangay Kamputhaw niadtong petsa 17 sa Abril.

Ikomparar kini sa presyo sa bugas nga napalit sa City Hall nga tag P1,400.00 ang tag 25 kilos unya di pa gyod maayo’g klase kung itandi sa “Doña Conchita.” Nagkadeperensiya kini og P250.00 kada tunga sa sako na bugas.

Wa gyud ko kasabot. Nganong tag P1,400 per half- sack nga bulto ug daghan man ilang gipalit? Di ba sa atong naandan mas makabarato man ta kung daghan ang  paliton? Butang kini nga angay’ng  subayon ni Mayor Labella.

Nakatilaw ko sa gipanghatag sa siyudad nga gipaagi sa Mayor’s Information and Liaison Office.

Duha ka klaseng bugas ilang na-apod-apod sa Lahug area. Ang usa gisulod og color blue nga sako nga medyo ma-arang-arang nga klase pero ang ikaduhang sako color yellow maoy baho-baho nga klase unya lagom ang bugas.

Sa procurement document ni City Administrator, Attorney Floro Casas Jr., niabot  og biente singko ka libo (25,000) ka sako ang ilang gipurchase nga tag 25 kilos nga tag P1,400.00.

Akong gikwenta ug kung duna man gani anomaliya na nahitabo, dunay pangitaonon na P6,250,000.00. Gibasi nako akong kwentada nga sa matag sako gipaburotan og tag P250.00 ug multiply by 25,000 half-sack rice. Apan, mao lang kini kung duna man gani anomaliya na nahitabo gyod.

Ug kung duna man gani, makasulti ko na mao ni ang nakaporke kay samtang gihamok kita niining kataladman nga COVID-19 duna pay nagpahimulos.

Apan  kung  tinuod  ang depensa  sa kampo ni Mayor Labella  nga  igo ra  silang  misunod  sa  paagi  ug proseso ni Osmeña kaniadto, duna koy pangutana, sundon ug kopyahon diay ang sayop? Tinarong man kaha ni ang administrasyon ni Mayor Labella?

In fairness hinuon ni Attorney Casas, nihimakak na siya sa pasangil sa kanhi mayor ug iyang gi-esplikar nga aboveboard ang tanan.

Pero  masubay  ra  unya  ning tanan ug  mahibaw-an ra kini ang tanan kung maimbestigahan kini og tarong sa Commission on Audit ug sa Ombudsman.

***

Naunsa  naman tawon  ni si  Cebu City Vice Mayor Michael Rama nga  mao ra man og kuwang sa pansin. Nagsige  naman lang ni siya’g panaway kang Mayor Edgardo Labella nga inutil pagsulbad sa problema  sa COVID-19.

Di tawon SUPERMAN si Labella, Mr. Vice Mayor.

Inay motabang ka sa Labella administration kay kauban mo’g partido pero nagsige naman kag pamaghot noon.

Unsa  may tuyo ni Rama? Gusto na siya’ng mopuli sa trono sa Mayor’s Office kay dugay na siya’ng gimingaw?

Hangtod karon wa pa ka adjust si Rama sa iyang pagkakanhi mayor dinhi sa dakbayan sa Sugbo? Asa man tuod siya sa mga nanglabay’ng mga adlaw?

Nahadlok sa COVID  o na busy sa iyang pamilya?/dbs